Opera Nordfjord: Hans og Grete
Opera Nordfjord: Hans og Grete

Hans og Grete, Opera Nordfjord

2. - 12. oktober

Den vakre, skumle, sjarmerande, morosame og gripande operaen Hans og Grete, etter Brødrene Grimm sitt eventyr, er Opera Nordfjord sin hovudproduksjon i 2019. Her er garantert noko for ein kvar smak: først og fremst storslagen, romantisk musikk, dernest folkelege barnesongar vi kanskje har høyrt før, himmelsk ballettmusikk når dei fjorten englane kjem ned og vakar over borna i skogen, ei skikkeleg fæl heks i eit pepparkakehus i skogen, ei ond stemor, og framfor alt: modige born.

 

Det har vore ein draum i mange år for Opera Nordfjord å setje opp operaen Hans og Grete av Engelbert Humperdinck. Til hausten skjer det: endeleg skal Opera Nordfjord fortelje det kjende eventyret av Brødrene Grimm, tonesett av storslagen, vakker musikk, wagnersk i tonespråket.


Solistlaget er ei blanding av veletablerte solistar med ei lang merittliste bak seg og nyutdanna songarar, som er i starten av operakarrieren. Hans vert sunge av svenske Marika Schultze, som i vår vert uteksaminert frå operahøgskolen i Oslo, medan Vibeke Kristensen, kjend for vårt publikum frå Flaggermusen, Tryllefløyten og Jegerbruden, skal synge rolla som Grete.
Trond Halstein Moe, som har eit heilt arbeidsliv frå Den Norske Opera & Ballett bak seg, skal tolke rolla som Faren (Peter). Han har tidlegare gjort roller for Opera Nordfjord i Madama Butterfly, Opera i Kyrkja og Hoffmanns Eventyr. Siv Oda Hagerupsen har gjesta Opera Nordfjord ved fleire høve, både i Figaros Bryllup, Eugene Onegin, Maskeballet og Hoffmanns Eventyr og skal synge rolla som Mora (Gertrud).
Heksa vert spelt av den svenske tenoren David Fielder, som gjestar Nordfjord for aller første gong.
Det er ei ekstra stor glede å presentere ein av «våre eigne» songarar, nemleg sopranen Elisabeth Gimmestad, som kjem frå Sandane. Ho har master i song frå Norges Musikkhøgskole og gjorde rolla som Ida i Flaggermusen for Opera Nordfjord i 2013. I Hans og Grete skal ho synge rollene som Jon Blund og Duggfé.


Det kunstnariske teamet er allereie i gong med planlegging av regi, scenografi, kostyme, lyssetting og maskearbeid. Amerikanske Jeff Pedersen, busett i Stongfjorden i Sunnfjord, skal ha regien, og han gler seg til å gjere sin aller første opera. Åse Hegrenes er kjend for Opera Nordfjord frå både Flaggermusen og Sildagapet og skal ha ansvar for både scenografi og kostymedesign. Marianne Wedseth skal ha lysdesign og har ei lang og aktiv karriere bak seg frå mange profesjonelle teaterscener. Ingunn Schumann Mosand er tilbake som maskør etter La Bohéme i fjor haust. Candice Bredesen skal ha koreografiansvar for den kjende ballettscena, og Michael Pavelich har som vanleg det musikalske ansvaret.

 

Sjølv om Hans og Grete er basert på det kjende eventyret som vi alle las som born, er det ein «vaksen», fullscenisk opera, som passar både for det tradisjonelle operapublikumet og for born og unge frå skulealder og oppover.

 

Hans og Grete hadde verdspremiere i Tyskland vesle julaftan 1893, dirigert av sjølvaste Richard Strauss, og operaen vart straks ein publikumssuksess for både vaksne og born. Operaen er av dei kjæraste og meste spelte i operalitteraturen på verdsbasis, og no er turen komen til Nordfjord. Opera Nordfjord har ønskt å setje opp dennne operaen sidan dei starta opp i 1998. Etter 20 år er dei klare, og vi gler oss til premiere og sju påfølgjande framsyningar!

Nordfjord Hotell tilbyr operapakkar, kontakt dei direkte her. 

 

 

 

Klikk her for Facebook-arrangement


Framsyninga varer i om lag 2,5 inkl. pause.

 

Billettprisar (inkl avg):
Ordinær 495 kr
Barn, ungdom og student 240 kr
Operaens venner 445 kr (maks 1 billett per medlem, bruk utsendt kode)
Det er ikkje grupperabatt eller honnørbillett.

Rullestol? Følgjekort? Kontakt post@operahuset.no, Eid bibliotek tlf 918 58 980 eller "billettluka" på kino eller kulturarrangement.

Ønskjer du å kjøpe eit større antal billettar samla, og få tilsendt faktura? Kontakt post@operahuset.no.